Les pitances

A mi prestame pela vida cuando mos xuntamos tos nel puiblu pa cellebrar algo (ca vez menos, per desgracia), bien sea porque ye la fiesta del chugar, porque una parexa va pasar pela vicaría o porque bautizase un mocecu, anque desto último prácticamente ya nun malcuerdo. Claro que como nun i dé per ponese a parir a Ramirina la floxera, que rayando casi los cincuenta tavía pue tar na edá de merecer, a les demás ni yantándomoslo col vitru isi. Ni licuao. Ta buinu el mio Pepe, el prubín. Como pa facelu padre.

El casu, a lo que diba, que liome más de la cuenta y lluego nun sé per onde entro ni per onde salgo; diciavos que me gusten muncho les pitances en les que tamos narmonía. Primero chegamos tos muy compuestos; echos con la raya el pantalón marcá darriba abaxo y echas col mexor vestíu pa la ocasión. A cualquier paisanu que te arrimes va date un tafu a “Varón Dandy” que tira patrás. Les muyeres, ya se sabe, que si fragancies a roses, a tulipanes, a xazmín... Resumiendo, toa la floristería metía pola piel, namás que pa desimular el pestezu a güerta. Pero en cuanto les tortilles de patata y el chorizu fritu cheguen enriba la mesa acabose el perfumamientu dafechu. El que más y el que menos nun tarda en entafarrar el focicu de grasa y si la suerte nun ta de cara isi día a la mínima apaez un champarón pela pechera que ya val pa entamala cola parienta, que pa eso, les coses como son, les muyeres nun tenemos gota pacencia. Que si yes un guchu, que si nun se te pue sacar de casa, que si tabes muy güepu metíu nuna corripa... Mientres tanto él, coloréu como un pimintu, trata de tragar el buquéu de pan y de char tierra patrás. Bah, nun veis que nun ye ná; esto quitase con un puquiñín de “Persil”. La verdá ye que cuando somos nosotres les perjudicaes ye completamente distinto. Oy, qué mala pata; claro, taba tierno del to, soltamos muy compunxías, dandoi saliva col pañuilu. Si hay algún mastuirzanu a la vera pa chai la culpa nun fayen falta más remilgos.

A medía que va pasando el timpu la cosa tira a peor. En momentu que empiecen a descorchase botelles de sidra y de vino aquecho ya nun tién remidiu: Colasón el de los xingones, que siempre foi muy folixeru, arrancase con una asturianá (la del “Xilguerín parleru”, polo xeneral), Vicenta la aventá tien la costumbre de dexar la saya al aire, pegando reblagos pa una vera y pa otra, y Clotilda la de los estasiaos nun para de dar palmás y de dicir “ansina, ansina se fai”. Como diz el mio Pepe, y neso tién una razón como un sentu, ye pa velo. Salú pa tos, que depués de to ye lo que val.