De murga
LA VOZ DE LENA

De murga

JOSEFA LA DE CELESTA

JOSEFA LA DE CELESTA | 26 sep 2021

Bah, nun me digáis que nun ye muy guapo andar de murga. A mi préstame pela vida, fía. Home, una ya nun ta pa tantos trotes como cuando yera chavala, que nun se me ponía ná per dellantre, pero tavía tengo humor bastante pa catar un vestíu curiusu pel armariu y baxar a comer una ración pistonuda de callos y tomar unos culetes de sidra pola Pola, como pienso facer nes Feries. Sí home sí. La vida pasa volando y hay que sacai tol xugu que se puea. Como diz el mio Pepe, y neso tién una razón como un sentu, cuando espurres la pata nun val un rial to lo que tinías aforrao, porque queda to piriquí pa otros. En cambiu, mira, él nel asuntu la murga ta muncho más viiyu que yo. Per más que aporfio pa que se mude y vaya conmigo diz que nanai de la china, que ta muy agusto en casa. Que faga lo que i dé la gana. Ya anduvo de candonga asgaya de xoven.

Panadería Llera

Pa eso el que tavía tién mecha pa dar y tomar ye Enriquín el castañueles. Oyes, ye un paisanu eltu y bién portéu, pero nun hubo ninguna rapaza capaz de camelalu y metelu en vereda. Ni a tiros. Ye folixeru folixeru. Onde hay una gaita sonando o alguien chando una cantará achí ta él espetéu. El primiru. Como tién que ser; qué rediós. Tolo contrario quel so hermenu, Tista el roncón, sicu y afuméu hasta comelo y dexalo. Paez que i cuesta dicite hola si te topa de focicos pela caleya. Nun saca la voz de dientro, el castrón. Fai bona parexa cola mustia que tién per muyer, Minia la de los apitaxaos, que ye un alma en pena. Lutru día cuntábame que echa lasuntu la comía pa toa la selmana que lu solucionaba cociendo unes patates y echándoyos unes berces y un pizquín de aceite percima. Oh Virxen, como vas tener espíritu pa ná con eso namás nel estómagu. Tas meyor pa metete nel catre. Quita, quita.

Casa María

A mi dame xente como Antona la ramplona, que en paz estea, que en cuanto morru el so Armandón el mosquilón, que yera un botarate, coló pa Benidorm a desfrutar como una choca. Fueron cuatro o cinco años, hasta que nun pudo colos zaragüeles, pero nechos vivió lo que nunca había vivío. O Sinda la jugosa, que tos los domingos plántase en Uviéu a un baile que fayen nuna sala fiestes de muncha nombradía. Bueno ná, a ver si mos alcontramos perende y dexáis algo pagao. Pasailo bien y nun miréis patrás, que ya vendrán ratos de sobra pa aburrise. Salú pa tos, que depués de to ye lo que val.

Temas relacionados:

josefa la de celesta

Opiniones de este contenido

Esta web se reserva el derecho de suprimir, por cualquier razón y sin previo aviso, cualquier contenido generado en los espacios de participación en caso de que los mensajes incluyan insultos, mensajes racistas, sexistas... Tampoco se permitirán los ataques personales ni los comentarios que insistan en boicotear la labor informativa de la web, ni todos aquellos mensajes no relacionados con la noticia que se esté comentando. De no respetarse estas mínimas normas de participación este medio se verá obligado a prescindir de este foro, lamentándolo sinceramente por todos cuantos intervienen y hacen en todo momento un uso absolutamente cívico y respetuoso de la libertad de expresión.




 No hay opiniones. Sé el primero en escribir.


Tu opinión

Muebles Pico
Danylu
CULTURA L.LENA