Nun val pa ná

Desde luego, fíos, la tele nun val pa ná. Lo que se diz pa ná, pa ná. Toi convencía. Ye lo mesmo que la priendas a una hora que a otra. O que metan más canales, porque nun se llibra ni ún. La semana pasá vinieron piriquí la nena y el zampatortes del mio sienru y él, que va de llistu y de modernu, cuando ye más oveya quel que asó la mantega, al poco de chegar ya se punso a rabilar col aparatu isi de los botonucos pa, según dicía, agarrar unes cadenes que son nueves. Lo que fizo foi escojonamos les que se vían bien, que agora véyense con tanta nieve que paecen Payares en plenu inviernu. ¿Qué quiés? De onde nun hay nun pue salir. Siempre se oyú.

El casu ye que, lo que vos cuntaba, sacando cuatro coses, lo demás ye puxarra pura: la mayoría del añu col fútbol dichusu, como si nun hubiera más vida pallá del pelutu, y nesta época con que si tal famosa o nun sé cual actor anden col culu y les tetes al ventestate per una playa o navegando nun barcu. Fayen lo que deben. Si tan achí y ansina ye porque se lo puen permitir. ¿Quién yos lo quita? Como diz el mio Pepe, y neso tién una razón como un sentu, si yo tuviera perres asgaya taba dende la mañana a la nuiche tiréu a la bartola, ensin ximielgar una paya, y si yos apitez retratame que me retraten. Bueno ná, será que hay que chenar tantu timpu y como nun tienen otra cosa...

Anantias, cuando nun había tele, vivíamos tos muncho más contentos y felices, alreor del fuiu, esmorgando panoyes y charrando de lo que pintara, en armonía. Tavía macuerdo de les burraes tan enormes que soltaba Flora la esconsoná, que mos explicaba cé por bé lo que facía col home nel catre. O de los chistes de Cundo el de los mosquilones, que mos esmorecíamos de risa. Eso perduse con tantu progresu y tantu canal, que sí, valdrán pa entretener, nun lo discuto, pero la xente ta amargao. Paez que ta tol mundo afuméu, rediós. Salú pa tos, que depués de to ye lo que val.